आर्थिक वर्ष २०८२/८३ मा देशभर घरजग्गा कारोबारमा उल्लेख्य सुधार राष्ट्र बैंकको तथ्यांकले देखाएको छ।
एक वर्षमा घरजग्गाको कुल कारोबार संख्या ४.७४ प्रतिशतले बढेको छ। अघिल्लो आर्थिक वर्षमा भने कारोबार संख्या १.८४ प्रतिशतले घटेको थियो।
समीक्षा अवधिमा कुल ७२० अर्ब ८६ करोड रूपैयाँ बराबरको घरजग्गा कारोबार भएको छ।
अघिल्लो आर्थिक वर्षमा यस्तो कारोबार ३८६ अर्ब १५ करोड रूपैयाँमा सीमित थियो। यस आधारमा कारोबार रकममा ठूलो वृद्धि भएको देखिन्छ।
आर्थिक वर्ष २०८२/८३ को चौथो त्रैमासमा मात्रै २७५ अर्ब ७३ करोड रूपैयाँ बराबरको घरजग्गा कारोबार भएको छ।
अघिल्लो आर्थिक वर्षको सोही अवधिमा यस्तो कारोबार १२७ अर्ब ६१ करोड रूपैयाँ थियो।
चौथो त्रैमासमा घरजग्गाको कुल कारोबार संख्या पनि अघिल्लो आर्थिक वर्षको सोही अवधिको तुलनामा १२.२५ प्रतिशतले बढेको छ।
अघिल्लो आर्थिक वर्षको सोही अवधिमा कारोबार संख्या १४.६५ प्रतिशतले बढेको थियो।
समीक्षा अवधिमा लिखतपारितअन्तर्गतको कारोबार संख्या १२.२८ प्रतिशतले बढेको छ। त्यस्तै, लिखतपारितअन्तर्गतको राजीनामा कारोबार संख्या २२.८८ प्रतिशतले बढेको छ।
अघिल्लो आर्थिक वर्षको चौथो त्रैमासमा राजीनामा कारोबार ८.१५ प्रतिशतले मात्रै बढेको थियो।
घरजग्गा कारोबार भएको कुल क्षेत्रफल पनि १५.४१ प्रतिशतले बढेको छ।
अघिल्लो आर्थिक वर्षको सोही अवधिमा कारोबार भएको क्षेत्रफल २.९८ प्रतिशतले घटेको थियो।
कारोबार बढेसँगै सरकारको राजस्वमा समेत वृद्धि भएको छ।
समीक्षा अवधिमा घरजग्गा कारोबारबाट संकलन भएको राजस्व ४८.२६ प्रतिशतले बढेको छ।
त्यस्तै, घरजग्गा कारोबारबाट संकलन भएको पुँजीगत लाभकर ६३.२२ प्रतिशतले बढेको छ।
घरजग्गा क्षेत्रमा बैंक कर्जाको प्रवाहमा समेत वृद्धि भएको छ।
आवासीय घरजग्गा कर्जासहित समीक्षा अवधिमा यस क्षेत्रमा प्रवाह भएको बैंक कर्जा ६.९३ प्रतिशतले बढेको छ।
अघिल्लो आर्थिक वर्षको चौथो त्रयमासमा यस्तो कर्जा ५.८६ प्रतिशतले बढेको थियो।
यसरी हेर्दा आर्थिक वर्ष २०८२/८३ मा घरजग्गा कारोबारको संख्या, कारोबार भएको क्षेत्रफल, कारोबार रकम, सरकारी राजस्व तथा पुँजीगत लाभकर सबैमा वृद्धि देखिएको छ।
विशेषगरी आर्थिक वर्षको अन्तिम त्रयमासमा कारोबार रकम र गतिविधिमा आएको तीव्र वृद्धिले घरजग्गा बजारमा वर्षको अन्त्यतिर कारोबारको गति बढेको देखाउँछ।
-1706234543.jpg)
-1746009348.jpg)
